ASTE HONETAKO PROIEKTUAK

Aste honetako proiektuak pila bat gustatu zaizkigu!

HELBURUA: OSTIRALEAN FRUTA BROTXETAK EGITEA IZAN DA.

Beraz, erabaki genuen ostegunean merkatura joango ginela garaiko frutak erostera. Baina noski, merkatuan zer erosi jakiteko, lehenengo sasoiko frutak zeintzuk ziren jakin behar izan dugu. 

Gero erabaki zeintzuk erosiko ditugun eta ondoren zerrenda bat egin dugu erosiko ditugun frutena!

Bestalde, jakiteko dirua nola erabiltzen den eta merkatuan kanbioak ondo zenbatzeko denda bat osatu dugu! Dendarako produktuak guk geuk marratu ditugu grafomotrizitatea lantzeko, ondoren margoztu eta moztu ditugu. 

Hurrengo egunean jada produktuak genituela denda bat sortu genuen eta Ane irakaslea dendaria izanik, gu produktuak erostera joan ginen olgetako txanponak erabiliz. Baina gu azkarrak izan ginen eta binaka eta hirunaka ipini ginen diru gehiago izateko eta beraz produktu gehiago erosi ahal izateko! Hor ibili ginen guk sortutako dendan produktuak erosten eta antzerki pixka bat egiten ere!

Ostegunean beraz merkatu plazara joan gara, eta bidean "SARDINA BAAAT", "OELELE", "IKASTOLA GORA GURE IKASTOLA" eta hainbat abesti abestuz joan gara! Merkatu plazara heldu garenean irakasleek esan digute barruan ezin genuela abestu eta seriotasun pixkat bat erakutsi behar genuela eta halaxe egin dugu! Beraz bertan marrubiak, sagarrak, udareak, platanoak, mandarinak eta gereziak erosi ditugu! Talde bakoitza merkatu plazako fruta denda batera joan da eta han ibili gara, zenbat balio duen galdetu, zenbat diru dugun kalkulatu, zenbat kilo erosi ditzakegun pentsatu, zenbat diru eman behar diogun, zenbat bueltatu behar diguten... Merkatu plazako saltzaileak ere poz-pozik geratu dira gure bisitarekin!

Eta sekretutxo bat kontatuko dizuegu, Alazneren gelakoen erosketarekin 20€ko bale baten zozketan sartu gara! Tokatzen bazaigu denontzako fruta erosiko duela esan du irakasleak!

Baina horrenbeste fruta zertarako erosi dugu? Bada bihar frutaren eguna denez, fruta brotxetak egingo ditugu hamarretako lez eta hauek jango ditugu eta sobratzen bada HH2-3koengana joango gara fruta ematera. 

Hala ere asko sobratzen bada likuadora ekarriko omen dute esan dute irakasleek eta arratsaldean fruta zukuak edango ditugu! 

ZINEA

Gaur zineman izan gara!
Herri eskolakoekin batera KOKO 2, filma ikusi dugu.
Txintxo-txintxo portatu gara eta asko gustatu zaigu!

SENDABELARREN MISTERIOAK EZAGUTZEN

Kaixo denoi!
Astelehenean Magaliren ama Ainhoa etorri zitzaigun hainbat azalpen ematera. Sendabelarren inguruan hitz egin zigun.
Ainhoa hainbat landarerekin, jarabeekin, sustraiekin etorri zen ikastolara eta hauetako asko ezagutzen genituen!
Gainera bakoitzak hartzen dituen jarabeen landareak ezagutu genituen, ze eragin dituzten, nola prestatzen diren... Guk noiz hartzen ditugun azaldu genion eta berak egokiak zirela ere azaldu zigun.
Honez gain, landereetan zati ezberdinak jan daitezkeela ere azaldu zigun, sustraiak (adibidez jenjibrea), hostoak (asuna), zurtoina eta loreak (echinacea) esaterako.

Gehien bat, echinacaea, diente de leon, yanten, asunak (arrak eta emeak), azaldu zizkigun eta ondoren ikastola ondoan daukagun belardira joan ginen ea aurkitzen genituen Ainhoak gelan erakutsitako landareak!

Esan beharra daukagu harrituta geratu ginela gure inguruan zenbat belar osasungarri ditugun!

Eskerrik asko Ainhoa!

Beste gurasoren bat animatuz gero ere gustora asko hartuko dugu!

LETXUGEN JARRAIPENA

Kaixo familia!
Oraingoan zuen kolaborazioa eskatzera gatoz. Pasa den ostiralean etxera letxugak eraman genituen, baina ikastolan batzuk utzi genituen. 

Ikastolan geratzen diren letxugen jarraipena denon artean egingo diogu baina bakoitzak bere etxean duenarekin zer gertatzen da?

Proposamen "txiki" batekin gatoz. Letxuga bat nola hasten den imaginatu dezakegu, ikusi dugu nolako txikiak diren eta azkenean merkatuan erosten dugunean nolako tamaina daukaten, baina honen garapena ez dugu (gehienok) sekula ikusi!
Beraz honen jarraipena egitera animatzen zaituztegu!

Horretarako jarraibide batzuk emango dizkizuegu eta zuei gehien gustatzen zaizuena egin dezakezue (nahi izanez gero noski!). 

- Letxugak egun ezberdinetan neurtu ditzazkezue eta gero paper batean apuntatu egun bakoitzean daukan neurria. 

- Letxugean garapena ikusteko egunero (edo bi egunetik edo hiru egunetik behin) argazkia atera dezakezue eta gero inprimatu ostean paper batean ordenatu, edo irakasleoi emailez bidali argazkiak eta guk inprimatuko ditugu eta denon artean hemen ordenatu. 

- Letxuga asko hazten denean nolako entsalada prestatuko duzuen ere erakutsi dezakezue edo eta honen errezeta idatzita ekarri. 

- Letxuga etxeko zein lekutan daukazuen ere adierazi dezakezue eta zergatik jarri duzuen toki horretan eta ez beste toki batean.

- Ea zenbatero ureztatzen duzuen letxuga. 

Edo zuei bururatzen zaizuena egin dezakezue!

Ea denon artean letxugaren hazkuntzaren inguruko "monografiko" txiki bat osatzen dugun.

ESKERRIK ASKO DENOI! 

Guk ikastolatik ere egingo dugu gure ekarpentxoa!

UDABERRIA, GURE BARATZA

Gaiaren amaierara iristear gaude eta.... HAUXE DA, GUZTION ARTEAN, ASTE HAUETAN ZEHAR EGIN DUGUN PROIEKTU ERRALDOIA!

GURE BARATZA!

POLITA GELDITU DA EZTA??

ERREKA MARIREN TXONTXONGILO IKUSKIZUNA

Atzo ERREKA MARIren txontxongilo ikuskizuna izan genuen ikastolan! 

Badakizue zein den Erreka Mari?

Euskal Herriko azken lamia da!! Erreketan bizi da eta beraz erreka hauek ondo zaindu behar ditugu, izan ere, zikintzen baditugu Erreka Mari hil egingo da eta beraz Euskal Herrian lamirik gabe geratuko gara!

Kontua da, Erreka Marik bere errekatik ihes egin zuela eta beste erreka batera joan zela, baina ez dakigu zein erreketara, beraz, onena gure inguruan ditugun erreka guztiak ondo zaintzea izango da, badaezpada bertan bizi bada ere!

Azkenean txontxongiloen emakumeak lantxo bat eskatu zigun. Erreka Mariren inguruko marrazki bat egitea eta berari bidaltzea, horrela berak bueltan oparitxo bat bidaliko digu! Zein izango ote da oparia?

ALAKINKIRRINERA ALAXAMURRERA...

ASTE HONETAKO PROIEKTUAK

Aste honetako proiektuak honakoak dira,

Matelogika gunean, gure ortua apaintzeko mural bat osatzen ari gara. Baina ez edonola, eh? Lehenengo hiruko taldeetan jarri gara. Ondoren talde bakoitzari pieza bat eman digute eta bertan agertzen ziren batuketak eta kenketak egin ditugu. Batuketa eta kenketa horien emaitzak hartu eta zenbaki bakoitzari dagokion kolorez margoztu dugu. Ondoren margoztu eta gero muralean dagokion zatian itsatsi ditugu. 

Plastika txokoan, berrerabilitako arrautza kaxekin erlauntzak egin ditugu. Lehenengo gure erlauntza tenperekin margoztu dugu, horrela ezti irudikatzeko. Bestalde erleak moztu, margoztu eta itsatsi ditugu gure erlauntzetan. 

Azkenik, irakurketa idazketa gunean, hitz gurutzatuak eta hizki zopa egin ditugu.