ASTE HONETAKO PROIEKTU PROPOSAMENAK

Jada UDAZKENA gaiarekin bukatu dugu eta orain NEGUA gaia lantzen hasiko gara. Aste labur honetarako proiektu proposamenak pixka bat ezberdinak izan dira. 

Duela hiru aste zuhaitz bat egin genuen taldeka, kartulinarekin eta gure esku markekin. Zuhaitza etxera eramaterako orduan arazo batekin aurkitu ginen beraz, aste honetan irtenbidea eman diogu eta proiektu proposamenetan erabaki da taldeko nork eramango duen zuhaitza etxera. 

Mate-logika gunean BINGO bat egin dugu, baina zenbakiekin egin beharrean kolore eta forma ezberdinetako elementuekin egin dugu. Horrela taldekide bakoitzak kartoi ezberdin bat izan dugu eta bingo lehenengo egiten duenak zuhaitza etxera eramango du. Batzuoi kostatu egin zaigu ez irabazte hori eta beraz, erabaki dugu blogean Zuhaitzaren txantiloia ipintzea egun hauetan etxean egin nahi izanez gero. Jarraian nola jolastu dugun BINGOra eta argazki batzuk ikusi ahal dituzue: 

Beste proiektua desberdintasunak bilatzean datza. Bertan 10 desberdintasun aurkitu behar izan ditugu: 

 ONDO ONDO PASA ZUBIA!!!

EUSKARAREN EGUNA, ELURREZ BETEA

Atzo EUSKARAREN eguna ospatu genuen ikastolan. Oso egun berezia izan zen denontzat, bai haurrentzat bai irakasleentzat. 

Goizean psikomotrizitate gelara joan ginen Argitxoren ongi-etorria ikustera. Argitxok esan zigun euskaraz solastuz gero kriseilu barruan zegoen kandela piztuko zela eta... Hala egin zuen! Magia eginez kandela piztu egin zen!

Ondoren gelan pixkat jolastu genuen, baina egia esan... jolasteko denbora zela esan baziguten ere gu leihotik begira egon ginen aho zabalik, mendiak, kaleak, kotxeak... dena zuri zuri zegoen! Zeinen polita! 

Haurrak pozarren eta irakasleak etxera helduko ote ziren beldurrez, baina gure txikitxoek haien etxeak eskaini zizkiguten lo egiteko, etxean lekua sobera omen dute eta gu ere sartzen garela! Beraz irakasleak ere eguna lasaiago pasatu genuen ;-)

Ondoren erdiko aretora atera ginen eta bertan Iñaki Astiazaranek pregoia irakurri zuen, denok txalo zaparrada handi artean agurtu genuen.

Honen ostean bazkaltzera joan ginen eta arratsaldean berriz erdiko aretoan bildu ginen denok. Mailaka dantzan egin zuten eta gu ikusle izan ginen, hala ere esan beharra daukagu, gure txikitxoek haien lekuetan eserita bazeuden ere dantzan ibili zirela! Zeinen gustora denok!

Bukaeran txokolatea bizkotxoekin hartu genuen eta erdiko aretoan geratu ginen jolasten baina... ikasle batzuk tranpa egin eta irakasle bat gelara sartu zenean zerbaiten bila... Hara non aurkitu zituen pila bat haur haien aulkiak hartuta leiho ondoan elurrari begira! Txintxo-txintxo zeuden eta pila bat zeuden disfrutatzen, esango genuke telebista ikusten baino gustorago egon zirela!

Eta ostirala bukatzeko... "BARIXAKU, BARIXAKU" abesten jeitsi ginen gurasoengana.

Ondo ondo pasa asteburua!

EGURALDI TXARRAREN AURREAN ZER?

Eguraldi tristea ere iritsi zaigu Elgobarrera. Hori dela eta ezin izan dugu kanpoko pistetara irten jolastera, baina... Ikastolako beste txoko batzuk aprobetxatu ditugu jolas ezberdinetan ibiltzeko!
Gehienetan goiko aretora joaten gara baina gaurkoan erdiko aretoan ere ibili gara!

Hona hemen gure argazki batzuk...

ASTE HONETAKO PROIEKTU PROPOSAMENAK

Aste honetan, udazkena gaiarekin bukatzeko proiektu proposamen berri batekin gabiltza. 

MATE-LOGIKA gunean zenbakiak, kopuruak eta motrizitate fina lantzeko ariketa bat egin dugu. Horretarako, lastotxoak moztuta, soka eta gometsak behar izan ditugu. Orriaren goikaldean zenbaki bat dago marraz idatzita. Guk zenbaki horren gainean idatzi behar dugu eta ondoren, soka barruan zenbaki horrek adierazten duen lastotxo adina sartu behar dugu. Ondoren lastotxoak ez jausteko gometsa bat ipini diogu.

PLASTIKA gunean hostoen inprimazioa egin dugu. Hau da, hostoak hartu, tenperaz margotu eta ondoren  kartulina zurien gainean inprimatu ditugu. Ondoren hostoa kentzean... zigilu baten antzera geratzen zen!

IRAKURKETA IDAZKETAN erdiko aretoan ibili gara altxorraren bila antzerako jolas batean. Erdiko areto guztian zehar 25 hitz egon dira izkutatuta. Hizki hauek bokalez hasten ziren. Hizkia aurkitu ondoren, horman zeuden tabloietan itsatsi behar izan ditugu dagokion bokalaren azpian. Ondoren jada hitz guztiak ordenatuta zeudenean, bakoitzari eman dizkiguten taulaten idatzi ditugu. 

Hemen duzue proiektuetan geunden bitartean atera diguten bideoa

2nd unit: JOHNNY

JOHNNY

Johnny etxean bakarrik eta oso aspertuta dago. Ez daki oraintxe zer egin. Halako batean, ordea, burutazio bat pizten zaio. Arrainontzira joan eta arraina kanpora ateratzen du. Aita iristean, harrituta esaten dio: "Baina, zer egiten duzu arrain horrekin, Johnny? Sartzazu berehalaxe bere ontzian!". Johnnyk aitari kasu egiten dio eta aita joan egiten da. 

Johnny etxean bakarrik eta oso aspertuta dago. Ez daki zer egin. Hala, beste gauza bat bururatzen zaio. Txoriaren kaiolara joan eta hau kanpora ateratzen du. Aita itzultzean, haserre honela esaten dio: "Baina zer egiten duzu txori horrekin, Johnny? Sartzazu berehalaxe kaiolan!". Johnnyk aitari kasu egiten dio eta aita berriz ere joan egiten da. 

Johnny etxean bakarrik eta oso aspertuta dago. Ez zaio egiteko moduko ezer bururatzen. Oraingo honetan, ordea, burutazio mundial bat pizten zaio. Sukaldera joan, kaxa bat hartu, ireki eta gaileta bat hartzen du bertatik. "Baina, zer egiten dut nik gaileta honekin? Bere kaxan uztera noa!"esaten dio Johnnyk bere buruari. Baina hobeto pentsatu ondoren, oihukatzen du: "Kaxan?... Ez, ahoan!". Eta Johnnyk gaileta jan egiten du. Aita etorri eta galdetzen dio: "Non dago gaileta, kaxan ala ahoan?"...

Landuko ditugun hitzak:

JOHNNY                                                           BIRD IN THE BIRD CAGE
BALL                                                                BIRD OUT OF THE BIRD CAGE
DOLL                                                                BISCUIT IN THE BOX
FISH IN THE FISH TANK                              BISCUIT OUT OF THE BOX
FISH OUT OF THE FISH TANK                   YUMMY, THE BISCUIT IS IN MY MOUTH!
DADDY                                                            JOHNNY, WHERE IS THE BISCUIT?

PROIEKTU PROPOSAMENETAN GUSTORA

Aste honetako proiektu proposamenak honakoak dira:

- Mate-logikan zuhaitzetan dauden hostoak zenbatu eta ondoren bi zuhaitzetan guztira zenbat hosto dauden idatzi behar dugu, baina ez hori bakarrik, baizik eta zuhaitz bat margoztu eta bertan hosto kopuru berdina marraztu behar dugu!

- Irakurketa-idazketan kontzientzia fonologikoa lantzen ari gara, silaba berdinez hasten diren hitzak elkarrekin elkartu behar ditugu. Ondoren behean M, J eta A-z hasten diren gure mailako ikasleen izenak idatzi behar ditugu, horrela beste geletako laguntxoen izenak idazten ere ikasten gabiltza!

- Plastikan... gogoratzen nola ekarri genituen zapata kaxen tapak? Ba... koadro bat egiten ari gara hoiekin! Duela aste batzuk hartu genituen hostoak bertan itsatsi, lehortzen utzi eta hurrengo egunetan tenperekin margoztuko ditugu, ez dakizue zein politak dauden geratzen!

Baina lasai eh, guzti hau egiteko 4 egun ditugu eta! Lasai lasai egingo ditugu guztiak... eta horren adibide... begira zein gustora eta lasai egon garen gaur Proiektu proposamenak egiten! 

Hemen duzue bideoa eta behean argazki batzuk:

Plastika

Irakurketa idazketa

 Mate logika

JOLAS LIBREA

Aste honetan jolas libreko garaian arratsaldetan gauza ezberdinekin esperimentatzen egon gara. 
Esperimentazio gunean tenperekin simetriak lantzen egon gara. Hau da, DIN A3ko orri bat hartu, erditik tolestu (bertikalki edo horizontalki) eta soilik orriaren zati batean margozten genuen. Ondoren zuriz geratutako orri zatia gainean ipini eta irekitzerakoan... voilà! Irudi berdina beste aldean kopiatzen zen! 

Aldiz mate-logika gunean regletekin lehenengo kontaktua izan dugu. Hutsuneak bete, irudiak osatu, eraikuntzak egin, etab. egin ditugu, nahiz eta guk ez jakin, matematika lantzen egon gara. 

Hemen dituzue gure argazki eta bideo batzuk